വഴുതന, വെണ്ട, പച്ചമുളക്, കാന്താരിമുളക് തുടങ്ങിയ ഇനങ്ങള്‍ ശിഖിരങ്ങള്‍ വെട്ടി വിട്ട് ഒപ്പം നല്ല പരിപാലനവും നല്‍കിയില്‍ വര്‍ഷങ്ങളോളം വിളവ് നല്‍കും.
അടുക്കളത്തോട്ടത്തില്‍ പുതിയ വിളകള്‍ നടുന്ന സമയമാണിപ്പോള്‍. ചില പച്ചക്കറികള്‍ ഒരു തവണ മാത്രം വിളവ് തരുന്നവയാണ്. ഒരു വര്‍ഷം കഴിയുമ്പോള്‍ ഇവ നശിച്ചു പോകുകയും പുതിയ തൈകള്‍ നടേണ്ടി വരുകയും ചെയ്യുന്നു. എന്നാല്‍ ചില ഇനങ്ങള്‍ നന്നായി പരിപാലിച്ചാല്‍ വര്‍ഷങ്ങളോളം വിളവ് നല്‍കും. ഇത്തരം ഇനങ്ങളുടെ ശിഖരങ്ങള്‍ മുറിച്ചു കളഞ്ഞു പരിപാലിക്കുകയാണ് വേണ്ടത്. ഇതിനു പറ്റിയ സമയമാണിപ്പോള്‍. പ്രധാനമായും പുതുമഴയത്തും അല്ലങ്കില്‍ ശക്തമായ മഴ കഴിഞ്ഞ് ഈ സമയത്തും ഇങ്ങനെ ശിഖിരങ്ങള്‍ വെട്ടി ഒതുക്കി പരിപാലിക്കുന്ന സമയങ്ങളാണ്. ശിഖരങ്ങള്‍ മുറിച്ചു പരിപാലിക്കേണ്ട ഇനങ്ങളും പരിപാലന രീതിയും മനസിലാക്കൂ.
ഇനങ്ങള്‍
വഴുതന, വെണ്ട, പച്ചമുളക്, കാന്താരിമുളക് തുടങ്ങിയ ഇനങ്ങള്‍ ശിഖിരങ്ങള്‍ വെട്ടി വിട്ട് ഒപ്പം നല്ല പരിപാലനവും നല്‍കിയില്‍ വര്‍ഷങ്ങളോളം വിളവ് നല്‍കും. പുതിയ തൈകള്‍ നട്ടാല്‍ അവ പരിപാലിക്കുകയും വളര്‍ന്നു വരാനുള്ള സമയം വരെ കാത്തിരിക്കുകയും വേണം. എന്നാല്‍ പഴയ ചെടികളെ പരിപാലിച്ചാല്‍ ഇത്തരം പ്രശ്നങ്ങള്‍ ഒഴിവാക്കാം. വഴുതന വര്‍ഗങ്ങളുടെ ശിഖരങ്ങള്‍ വെട്ടിയൊതുക്കി പരിപാലിച്ചാല്‍ വര്‍ഷങ്ങളോളം വിളവ് ലഭിക്കും.
ശിഖരങ്ങള്‍ മുറിക്കുന്ന രീതി
ചെടിയുടെ പടര്‍ന്ന് പന്തലിച്ച് നില്‍ക്കുന്ന ശിഖരങ്ങള്‍ മുറിച്ചു കളയുകയാണ് വേണ്ടത്. മഴയുള്ള സമയത്താണ് ശിഖരങ്ങള്‍ വെട്ടുന്നത് എങ്കില്‍ വെട്ടുന്ന ഭാഗം (മുറിഞ്ഞ ഭാഗം) പ്ലാസ്റ്റിക്ക് കവറിന്റെയോ മറ്റോ ചെറു ഭാഗം മുറിച്ചെടുത്ത് കെട്ടി വെക്കണം. മുറിഞ്ഞ ഭാഗത്ത് വെള്ളം കയറി ചീഞ്ഞു പോകാതിരിക്കാന്‍ സഹായിക്കും. ഒരാഴ്ച്ച കൊണ്ട് തന്നെ പുതിയ തളിര്‍ ഇലകള്‍ വരുകയും പഴയതിലും കൂടുതല്‍ ശിഖരങ്ങള്‍ വരുകയും ചെയ്യും. ഇതോടൊപ്പം തടത്തിലെ മേല്‍ മണ്ണ് അല്‍പ്പം ഇളക്കി വളപ്രയോഗം നടത്താം. മഴ ആരംഭിച്ചതുകൊണ്ട് വളപ്രയോഗത്തിന്റെ ഗുണം പെട്ടന്ന് തന്നെ ചെടികളില്‍ എത്തും.
